Cafe adesso Smáralind

Það halda margir að Cafe Adesso í Smáralind sé bara kaffihús. Svo er ekki. Cafe Adesso er veitingastaður með áhugaverðan matseðil, flott kökuhlaðborð, enda konditör á staðnum, og nú um stundir; sérstakan jólamatseðil.... að gefnu tilefni.....

Ég smakkaði kalkúnabringu á rauðvínslegnu rauðkáli (hvað eru mörg err í því?), með kartöflum, fersku salati og brúnni sósu.

Í traffikinni og erlinum, sem er þó minni í Smáralind en t.d. í Kringlunni, upplifði ég augnabliks upprof frá kapphlaupinu og fann svolítið "jóla" í þessari ágætu máltíð.

Ég ætla að fara aftur og prófa þá hangna kjetið með uppstúfinum. (Ég hef það fyrir satt að það megi aldrei hætta að hræra (aldrei!) í uppstúfum fyrr en þeir eru tilbúnir).